還有不夠一星期就過年，作為在職煮婦，要安排做糕點的時間真是十分緊迫。唯有利用放假時間。每年蘿蔔糕都會整兩轉，第一轉是送給同事、朋友。家人自用的大多會在年二十八或二十九。
今年蘿蔔糕做法跟往年不同，我改了個名叫[Dor Si 蘿蔔糕，即刻好多絲啦！哈哈！
舊年在上海街買了這個好助手，刨絲更快，更得心應手！
瑤柱臘味蘿蔔糕
材料:蘿蔔 8斤
三象牌粘米粉 700克
粟粉 120克
臘腸 2條
臘肉 1條
蝦米 2兩
瑤柱 2兩
蝦皮 2兩
蝦米瑤柱水 500毫升
蔥 適量
[此份量約可做七底長方形模(4"x8")]
調味料:
鹽 3茶匙
糖 3茶匙
胡椒粉 3茶匙
蠔油 5湯匙
做法:
1. 蝦皮過篩雜質；蝦米用一碗水浸軟, 留起蝦米水備用。
2. 瑤柱用一碗水浸約半小時，用中火蒸約半小時，取出後撕成絲，瑤柱水留起備用。
3. 臘腸同臘肉用熱水過一過，蒸約15分鐘。臘腸開半切粒；臘肉切小粒，備用。
4. 蘿蔔去皮，4斤切條, 4斤刨絲。
5. 粘米粉和粟粉混合備用。
6. 蝦米同蝦皮白鑊拱乾，加入臘腸; 臘肉; 瑤柱絲一齊爆炒, 炒至出味, 盛起備用。
7. 爆炒的鑊不用洗, 放入蘿蔔條兜炒至半熟，加入蘿蔔絲煮至蘿蔔轉透明後，加入調味料, 熄火約2分鐘。
8. 之後分數次將混合粉篩入蘿蔔絲裡攪拌勻。此刻要密切留意水分夠不夠。如比較杰身，可逐少加入瑤柱蝦米水。
9. 最後將臘腸; 臘肉; 瑤柱絲；蝦米；蝦皮加入拌勻, 但要預留少許材料鋪在糕面上。
10. 把所有材料材料倒進已掃油嘅糕盤裡, 大火蒸45分鐘至1小時. 最後趁糕尚熱時, 灑上蔥粒, 即成。
[小小貼士]
- 蘿蔔糕蒸完放涼後置於雪櫃冷藏 , 至少雪一晚才容易切件來煎。
- 蘿蔔糕不用加水, 因為蘿蔔會出水, 本身的水份再加上蝦米水同瑤柱水已經足夠。
- 臘腸和臘肉一定要爆至油份溢出, 即見到臘腸和臘肉油光閃閃, 令它們更香. 要原鑊爆白蘿蔔連汁, 吸盡臘味餘下的香味。
- 蘿蔔本身有苦澀味, 煮時加少少糖便可除去, 更加令蘿蔔更清甜。
- 蒸糕時要知道是否熟透, 可用小刀或筷子插入糕中間, 若見到刀底筷子沾着的糕不是純白色代表已經熟透。
- 自家製的蘿蔔糕, 由於沒有防腐劑, 通常可以放約10日,但建議最好在一星期內吃完, 以免影響味道.有些人喜歡加冬菇, 但會容易壞, 所以只能放2,3 天, 最多一星期。
![]()
